فرقه اسسها الدكتور نبيل بهجت فى مصر فى سنة 2003. الفرقه بتهتم بإستمرارية التراث الشعبى المصرى زى خيال الضل و الاراجوز و الحكاوتيه و صندوق الدنيا و الرقص الشعبى و الموسيقا الشعبيه. الفرقه قدمت عروض كتيره فى الشوارع والجناين والأحياء الشعبيه و قدمت عروض بره مصر فى تونس و امريكا ولاقت نجاح كبير. الفرقه شاركت فى مهرجان " ابن عروس " فى مسرح الأطفال وفازت بتلت جوايز. و شاركت الفرقه فى مهرجان أسيتاج فى مسرح الأطفال فى امريكا.
الفرقه بتعمل عروض من التراث و كمان مستلهمه من الحاضر و بتناقش مواضيع سياسيه و اجتماعيه مهمه زى ما كانت زمان فى العصر المملوكى اللى بيعتبر اقرب العصور للوجدان المصرى و البيئه المصريه.
فرقة ومضه فى نفس الوقت مدرسه بيلتحق بيها اللى يحب يتعلم الفنون الشعبيه المنبثقه من التراث الشعبى المصرى العريق. بيتدرب الملتحق على طريقة تصنيع الغرايس الشعبيه و ادوات العرض و طرق عمل عروض خيال الضل و الاراجوز.
الفرقه بتعمل كمان افلام تسجيليه فيها مواد وثائقيه نادره و عن مواضيع من التراث الشعبى وعن مشاهير مخايلية خيال الضل زى حسن خنوفه و النمر و عم صابر المصرى اكبر أرجوزاتى فى مصر.
نبيل بهجت صاحب الفرقه عمل أول مهرجان لخيال الضل و الاراجوز بالتعاون بين منظمة اليونيسكو و الفرقه ، و عمل الملتقى الأول للعروسه الشعبيه بالتعاون مع وزارة الثقافه المصريه.
