غلطتى حبك
*********

غلطان ...أنا غلطان

وغلطتى حبك

أنا إللى مهما كان

ومهما أشوف منّك

ما أقساش عليكى يوم

دايما أشيل همّك

وإنتى إللى يوم ورا يوم

تزيدى أوجاعى

وتغربينى بعيد

عنّك بلا داعى

فى الغربة أحن وأئن

وأتمنى أرجعلّك

غلطان ... أنا غلطان

وغلطتى حبك

انا إللى مهما جرالى

راضى وعليه عاذرك

عارف إنك كدة

القسوة دى طبعك

وأصبر لاجل تِرِّقى

ويحن لى قلبك

لكن يرق الحجر

وإنتى ما تِرِّقيش

بقيتى جامدة ليه ؟

عُدْتِّى ما بتحسيش

هوَّ إنتى موتِّى خلاص ؟

صارحينى ..ماتخبيش

وأنا إللى مهما كان

فى قلبى أشيل سِرّك

غلطان .. أنا غلطان

وغلطتى حبك

مش طالب الغفران

ولا عايزك تسامحينى

ما دُمتى فى الأحزان

بِتْحِبِّى ترمينى

أنا باعلن العصيان

ولا شىء هايهدينى

معدش فايدة خلاص

ولا رجاء فيكى

ضيَّعتى مِنّى العمر

برىء أنا مِنّك

وغلطتى حبك

ع الحب حاسبينى

لكن ما تغصبنيش

أكون فى يوم كارهك

دا إنتى مهما كان

وطنى وأنا منّك

وفِطْرِتِى حبك

(ناجى الجندى )