#عم_عادي

عم ( عادي ) ابن ( عادي ) 

شايف الأيام رمادي ...

مش ف باله ابيض و أسود ...

شوفته كان ماشي قصادي 

شايل الاحلام ف جيبه ...

ماشي يضحك من نصيبه ...

عم ( عادي ) أصله طيب ...

بس عيبه ...

لما خلف ...

سمي ابنه البكري ( صابر ) 

واللي بعده اسمه ( راضي )!!!!!

عم عادي 

مش بيشرب الا صبر 

مش بيحلم غير بقبر 

متر حتى و لا شبر 

كله .... عادي 

عم عادي.. 

مش بيحلم مهما نام 

عاش بياكل م الكلام 

و اكمنه فاشل ف العلام 

لاعبوه حادي و بادي 

عم عادي.. 

مش ف باله أي شئ ...

عاش برئ هيموت برئ ...

و لما كانت يوم تضيق .... 

يقول عادي عشان ولادي ...!!!

عم عادي...

عم ( عادي ) و من زمن ... 

راضي ب عيشه العفن 

عمره ما حب الحياه ...

بس بيحب الوطن ...

و ده... مش ( عادي )

سيد صادق