أنا زي الشجرة الملعونه

 =============

افتح كراسك

اشطبني

والعنى ف كل كتاب

وامسك اشعاري

وارميها

قدام الباب

واحرق جواباتي

المكتوبه بعرق الشوق

فتفت أحلامي

واحدفها

ف المر...  تدوق

واشنق تواريخي

ف أوجاعى

وارقص على لحن

وداعي

أنا زي الشجرة الملعونه

بتلم الضله ف جيوبها

ولا بصت مرة لترابها

ولا كانت لطيورها

حنونه

وبتعشق ف هوايا

خريفى

مش قادر احسك

من تاني

ولا قادر

اشمك ف حروفي

ولا قادر

اسبح ف بحورك

ولا شايفك حتى 

ف تخاريفي

ولا طايق طيرك 

ف سمايا

ولا عاوزك

نسمه ف يوم صيفى

انساني

وارمينى امبارح

واخرج من بين

 ..... تجاويفي