★★حَالْ مْحَلْحَلْ★★

حَال مْحَلْحَل فْ لَوْحَلْ ... ؤ مَا مِنْ حَلّ

مُولْ لَمْحَلّ رْحَلْ .... ؤ رْخَى لَحْمَلْ

عْلام ْالأمة فْ حْداد..... لاَبَس لَكْحَلْ

ؤ شِيخ الأمة في وَاد .... ؤ ما عَاد فْحَلْ

كُلْشِي فْ الفُوضَى غَارَقْ... 

                  لا  وَاحَدْ  فِينا يْفَارَقْ

لْخُو مْعَ خُوهْ مْشَانَقْ

                 ؤ مْعَ لَعْدُو يْتْعَانَقْ

                             وْ جْعَلْ مَنّو خِلّ

هذا يْنَافَقْ ... هذا يْمَارَقْ

ؤ ذَاك غْشّاش وْ سَارَقْ

هَذا يْسَابَقْ ...هذا يْلاَحَقْ

ؤ ذاك عْلى بْرَامْلُو قَارَقْ

                      يْلا ضاع مَالُو يَتْشَلّ

زْمَانْ يا زْمانْ هذا

 قطعوا وْصَالنا و زْيَادَة 

الفُرقة صَبْحَت عادة

 كلها وْ دَار حْدَادَة

                  ؤ مَنْ وْصَلْها يَحْصَل

 مَا رِيتْ فْ فْقِيهْ يْفَادَة

يَفْتِي وْ يْعَلَّمْ لَقْيادَة

وْ يْجَابَه حَرْب الإِبادَة

عْلى طْفَال خْتَارُوا الشْهَادة

               وَاشْ خَايَف لا يَوْحَل ؟؟

                      آه على حال ...

              حَال مْحَلْحَل فْ لَوْحَل... 

              .....ؤ مَا صَابْ الْحَلّ...!!!

يزيد علوي اسماعيلي