#من_ذكريات_القاهرة.... الجزء الأخير ***************************
رمضــان يهــــل بنفحــــاته ** كريم فى صومــه وصلواتــــه
رمضـــان زمــان النقشبنــدى ** ونصـــر طوبــار
والشيــخ رفعــت ** قبــل المغــرب ** يحلــى الافطـــار
نفطــر ونجمــع شلتنـــا ** ف الحــى وتــدور لفتنــــــــــا
علــــى كـــــــل دكاكيــــن حتتنـــــــــــا
دى امساكيــة مطعـم فــول ** مــددك يارسـول ** نعمل غاغــة
ودى امساكيــة من الصاغة ** مع كيس زبيب أو نــداغــة
نــدخل ياعمــى ** رمضــان كريــم ** فيــــن العــادة
يــدينــا تيــن أو قمـــر الديـــــــن
يدينــا بالرضــا وسعــادة ** خــيرك ورزقــك بزيـــــادة
وكلــه جــاى بفوانيســه ** نعمــل سبــق ** اجروا وهيصــوا
واللــى معاهــش فانــوس ييجى ** يحط شمعة ف علبــة صفيـح
وفى السبق يطلــع فايــــز ** اللــى يعــود بالشمــع صحيـــــح
بعــد اللفـالــف والــدوران ** نتلــم صحــبة اخــوات وجــيران
نشوف سمــير والضيف أحمد وجورج مع فوازير رمضـان
ونشوف عرايس التليفزيون ** قوقـة وبســة ** وبوبــى الحبوب
مــش بــس دول ** ده كمان لســة ** دبــة ودبــدوب
****************************
أمــا الأذاعــة وبساطتها ** بتعيــش النــاس حكايتهــا
مســلسلات لشكــار وفؤاد ** كوميديا جاية على هوايا
العتبة جــزاز ** والطوربيد عـاد ** ونت اللى قتلــت بابايــــا
وألـــف ليلــة وليــة كمــا ** وسيـد مــع حرمــه ف رمضـــان
وآخــــر الليـــل نتسحــــر ** قبــل الآدان لمــا يكـــــــبر
ومــن حــلاوة أيــامه ** دايمــا يخفــف ويقصـــر
نسمــع تواحيــش وابتهالاتــه ** ونســوى كحكــه فى صاجاته
وبسكويتــه فــى صوانــى **نفضــل فى شــوقة لنفحاتـــــــــه
لحــد مــايعــود مــن تانــى ** ونغنيلـــو أهــلا رمضــــــــان
ف القــاهــــــــرة الســــــــــــاحرة
كــااااااااااااان يــامــا كاااااااااااااان
******************
ولمــا يخلــص شهــــر الصــــوم ** بعــد العشــا نجهــز للنــوم
ونستحمــى حمــوم العيــــــــد ** نبــات ليلتنــا بلبــس جــديـــد
نــاخــد هــدومنــا وجزمتنـــا ** نحضنهــا تحـــت مخــدتنــــــا
ونقــوم نصلــى صــلاة الفجــر ** بعديهــا نقعــد ونكــــــــــبر
لحــد وقــت صــلاة العيــــــد ** نخــتم يــادوب نرجـع نفطــر
كــان الفطــار كحــك وبسكـوت ** وغريبــة مــع شــاى بحليـب
والحلبـــــة والــترمـــس جايـيـــــــــــن
نبــدأ نلــم عيديتنــا ** قــروش ولكــن تمـــلا الجيــــــــب
علــى صرفهـــم طبعــا قــــادريــــــن
النــص يخلـــص ع المراجيـــح ** ويضيع بقيتها على الصواريخ
نلعــب بكــورة ** صيــد أسمــاك ** وكيكــا تطلع ف العالـــى
خشبة وعصفور تريك تراك ** والسبعــاوية بتحلالـــــى
وشــبر نطــة مــع الشبريــن ** زلــزل وعنكــب والتنشيــن
بالبلـــى ومــا بنتقلــش ** نلعــب كــازوز أو نقــا مشمـــــش
أمــا البنــات ** تلعــب كبـــة ** بخمــس حبــــــات
وتنط حـــبل ** وهيلا هوبــا ** شاطريـن يابنـــــات
نــط الأولـــى بيعلمهــم ** فــن البـاليهــــــات
لعب العيــال من غــير كلفــة ** ألعــاب تحفـــــــــة
ممكــن تـرج ميــت فنــان ** وهــى دى عيشــة الاء نســــــان
ف القـــاهــــــــــرة الســاحـــــــــرة
كــااااااااااااااان يــامــا كــااااااااااان
*********************
