زجل مغربي

****الهضرة وْفات ****

كلام  تسالا ....و هضرة وفات

من عاش نْجا و من فات مات

فهاذ العالم ديما تْحِير

خلِّيك رزين مهما يْصِير

طْلب الحكمة ... رْجا لَعْفو

يمكن غدا نَتْوالفُو

مشات النخوة ما بقى تبات

تصبح هنا ... لهيه تبات

مهما تفعل .. مهما تدير

خليك واعي فين تسير

كانوا صحبة و  تعارفو

و على والو يتخاطفو

قصة سالات ... قصة بدات

ها هادي جات .. لُخرا مشات

و من كان شهدة رجع مرير

هذا قزدير ... هذا حرير

تلقاهم ف صف يتصافو

 وكل واحد هاز قنانفو

كلمة جُّور مهما علات ..

 الحق جا سبقها و فات

كيف الشمعة مهما ضوات

ياك ف ساعات راها طفات

صوت الفتنة مهما قوات

ما صاحب بندير غي غوات

قصة سالات .. الهضرة وْفات

و احسن تعبير هو سّكات

يزيد علوي اسماعيلي