سْأَلْتك يا وَذْني خَبْريني 

على خبار القوم 

آش سمعتي ؟؟؟

 قَرَّبتي ليا وقلتي :

عيشتهم سُكَّر

و مْدُونْهم عكر

و ما خليتي فيهم  ما تشكر

و سألتك يا عِيني آش قولك 

آش شَفْتي

شَفْتي فيا و قلتي:

عيشهم منكر

 بلادهم تدمر

واش من هموم ليك  ندكر

گلست مع راسي نفكر

والشك في خيالي يكبر

وما عارف فيمن لغدر ؟؟؟

واش ف الودن اللي تسمع ؟؟

و لا  ف العين اللي تنظر ؟؟؟

وقلت :

العين عيني و الودن ودني

شكون فيهم يخونني ؟؟

نسالك يا راسي

يا اللي مْسَكّنْهم فيك و سَاكَنِّي

ياك أراسي العين ديالي

و الودن طرف مني

شكون عليَّ يكذب ؟؟

واش العين اللي خالعاني ؟؟

ولا لَوْدَن  اللي تنافقني ؟؟

جاوب وقال الراس:

انا يا صاحبي 

ما كنت عليهم عساس

وما كنت معاهم حاضر

حيت كنت غارق ف نعاس 

قلت ليه من كثرة الفقايس:

سير يا راس

يا عديم الساس

ما نتا صالح غي للتهراس

يا النابت بين كتاف

و ما فالح غي ف التحواس

سير ... بعد عليا 

يا عديم الإحساس

غيب عليا و فارقني

 غي سير كمل نعاس

و گلست نخمم و ندمم 

ما قادر لا ندوي لا نتكلم

هذا أمر الله و ليه مسلّم

و قلت ناخد ورقة وقلم

و على الصفحات نفرق الهم

قبل ما نمرض و نرزم

ف لحظة ...

حسيت بشي معايا يتألم

قلت :شكون ؟؟

قال لي : انا قلبك أ معلم

 مالك حزين مجهم ؟؟

وگالس وحدك مأزم

حكيت ليه كل ما تقدم

ضحاااااك قلبي وقال:

فيق أصاحبي 

راك غي كتحلم !!!!!!!!!!!

علوي اسماعيلي يزيد