كلنا ولاد الناس
فينا اللي شجرتو ظليلة
وفينا اللي ما عندو ساس
و فينا اللي عايش بالحيلة
وفينا الشارب همو ف الكاس
فينا اللي جار معاه قبيلة
بدراهم من فضة ونحاس
كلنا ولاد الناس
كاين اللي تزاد
بملعقة دهب ف فمو
وكاين اللي قوتو
كسبو من عرقو و دمو
و كاين اللي بالخداع
كلا مغفل و نهمو
و كاين اللي عاش
و مزال ما عرف اسمو
كلنا ولاد الناس
فينا من عاش مفشش
و فينا من هو متغشش
فيما لمليوح مطيش
شمكار سكران محشش
كلنا ولاد الناس
اسمع يا اللي مربى كلب
و موفر له السلامة
راه كاين من حياتو حرب
يقتات من قمامة
اسمعي يا اللي تنقي الشحم من اللحم
و تعطيه غداء للكلبة
راه غيرك ما لقاش و لو طرف عظم
يحطو ف قدر الشربة
كلنا ولاد الناس
تعالوا نحطو يد ف يد
نمشي ف الطريق صحبة
نعيشو كلنا خوت
يجمعنا صفا و محبة
نصرمو خيلنا جميع
و نحركو ف نفس الصربة
راه كلنا ولاد الناس
.... علوي اسماعيلي يزيد ....
