*****{ #سيد_درويش }*****

.

.

قوم يا سيد الفن دايما بيناديك

قوم وعيد ؤاعزف لنا حاجة بإيديك

.

درويش يا عشرة طيبة

فيها هويت وانتهيت

ألحان تمللى قريبة

دخلت زمان فى كل بيت

نسمعها لما نحن لك

ونقعد نترحم عليك

قوم يا سيد الفن دايما بيناديك 

.

درويش يا فنان شعبنا

يا وردة ف الصحبة يا خل

إبعد جنانهم عننا

أوكا وأورتيجا خلوها خل

الفن بقى شئ يعل

والعود كمان وحشاه إيديك

قوم يا سيد الفن دايما بيناديك 

.

مفيش بعد غناك مغنى

الفن من بعدك هلس

رزعهم صدع ف دماغنا 

النغم بقى بنكه مفلس

اللحن بقى رتمه مغلس

تعالى انجدنا الله يخليك

قوم يا سيد الفن دايما بيناديك 

.

سرقوا صندوق الدندنة

ومفتاحه وياك

هاته عشان خاطرى أنا

يا تاخدنى معاك

مش ممكن أبدا ننساك 

ولا ماسكة العود بين إديك

قوم يا سيد الفن دايما بيناديك 

قوم وعيد اعزف لنا حاجة بإيديك 

.

.

بقلم/

مدحت يوسف