يا بنتي (باللهجة اللبنانية)
خايف عليكي اليوم و بكرا ، و من زمان
بالشبر والندر ربّيتك عالعزّ والإيمان.
إنتي حلم عالأرض ، قدّامي صاير حقيقة
إنتي أمل روحي و إلي أغلى صديقة.
...
قبلك ما كنت بخاف ولا أعمل حساب
و هلق قبل ما نام بقفل ميّة باب.
و كل ما بتضهري بعدّ بالوقت الثواني
تا ترجعي عالبيت وبعدني بحبّك أناني.
...
بغار عليكي من الناس ، كلّ الناس
تا صار عندي من القلق وسواس.
صرتي صبيّه و جوانحك طلعوا
قبلك الطاروا التهوا و ما عاد رجعوا.
...
نسيو رغيف الخبر الكنّا علينا نقسمه
نسيو باب البيت ، بنده و ما بيسمعوا...
خايف عليكي تضيعي بمتاهات الدني
بين الوحوش الماكرة بالكذب ، بالخبثنة.
...
خايف عليكي . تاركك و مش تاركِك
عندك عقل و حكمة تا تشوفي صالحك
و بوعدك ما زال في بصدري نَفَس
البيزعلك لح حلّفه التوبة ،عبرة و درس.
عدنان خليفة