عاشق بسيط
----------- جديد
مش فيلسوف
او حتى املك جيش حمام
انا يادوب عاشق بسيط
مش حيلتى غير نايى الحزين
وقلب يشبه للقلم مليان كلام
وبيكتبك موال غرام
لما يتعبى بشوق يفضل يقول
الحب ايه غير القبول
غير انى احضن كوكبك
بشمسى فى وقت الشروق
غير انى اسكر من عنيكى عشان افوق
غير انى اشوفك مركبى وانا قلبى موج
تحت شباكك انا واقف كتير و منتظر
طلتلك من خلف قضبان الستاير الحرير
يا اميرة لو شافها القمر بيدارى نفسه م الكشوف
والشمس من نورك بتسحب ضيها
يا لحن هادى بتنسجم فيه الطيور
الاسم نوره وانتى نور
يا وردة طارحه فى الربيع
قلبى الخريف مهاينش انه يقطفك
فبيزرعك بين السطور
الشعر قدامك ضعيف
افتحى ليا البيبان
معايزش افضل فى الحياة رحال وضيف
انا شوقى نار والشوق مبكى الناى ومخليه حزين
لفيت كتير بين القلوب وقلبى دابت خطوته
شافك نهاية سكته
قصدى البداية للنعيم
متفكريش
انى صايع او حالنجى او حتى بياع للكلام
انا قلبى عاشق الالتزام
بيصلى فى محراب عنيك
وحبه ليك الامام
اتوضى م الماضى الجريح
جايلك نضيف
ابيض كما يوم الميلاد
صافى كما شوب الحليب
اختارك انتى بعد ما طاف فى بلاد العاشقين
وعاش فى نفسه كتير سجين
جايلك ومادد الايدين
محتاج لحضنك ملاجئه
ومرسى لسفينته ال ضاع منها الشراع
قربى وحررينى م اللى فيه
يللا احضنيه وفى نعيمك سكنيه
لو حتى هيكونلك سجين
سجنك كمال حريته
وقلبك امانه م الطوفان
انا قلبى صايبه الجنان
من يوم ما شافك وهو عاشق الدرويشه
بينى فى هواكى مقام
طلى عليا واضحكى قربت اضيع
ونايي الحزين قرب يموت فيه النغم
قولى نعم يمكن تعود ليا الحياة
ومن جديد اتنفسك
ارجع انور من جديد
واعيش سعيد
#ابن_فخرى
