الورد له عبيره..و الحق بينشر عبيره.
و الزهر له عبيره..و الخير بينشر عبيره.
و الفل له عبيره..و الجمال بينشر عبيره.
و العنبر له عبيره ..و الحب بينشر عبيره.
و المسك له عبيره..و الفرح بينشر عبيره.
الحق لما يقوي
الكذب يستخبى من نفسه
يبعد بعيد أوى من نفسه
و ينتشر الحق فى كل مكان.
و الخير لما يسود
الشر يخاف على نفسه
و تصدقوا ياكل فى نفسه
و يتغير الزمان يبقى غير الزمان.
و الجمال لما يننشر
القبح يوحش قصد نفسه
و يبقى مش طايق نفسه
أصل الجمال زى النور
يغير العقول يا جدعان.
و الحب لما يستقر فى القلوب
الكره يزعل على نفسه
يدور على مكان يتاوى فيه من نفسه.
و الفرح بقى ييجى فى الااخر
و الحزن يتقوقع على نفسه
هيعمل ايه الحزن للى مالى الفرح نفسه.
و كانوا زمان بيقولوا ختامها مسك
و انا بأقول ختامها مسك و كمان ريحان.
يا ريت يجمعنا
عبير الورد و الزهر..
و الفل و العنبر
و المسك و الريحان.
و نقول الحق
و نعمل الخير.
و ننشر الجمال
و نبدر الحب.
و نوزع فرح على كل انسان
فى كل زمان
و كل مكان.
الشاعر العجوز
مرقص اقلاديوس
كل سنة و انتم طيبين
يا مصريين جميعا
