شكون نكون...
سولت نفسي في يوم انا شكون نكون
وشكون اللي جابني لهاد لكون
شكون يكون ...شكون يكون؟؟؟
كبرت لقيت نفسي فالدنيا وحداني
شكون اللي جابني لها ورماني
شكون يكون ...شكون يكون؟؟؟؟
عايش وحداني في دروب الحياة
ديما براني وما عندي اخوات
اش من حياة...اش من حياة؟؟؟؟
كفاش نكون انسان وانا محروم
عايش في ارض الاجداد وانا مظلوم
شكون نكون...شكون نكون؟؟؟
هايم بين برد الشتاء وبين الشوم
غطاي شوك السدرة وفراشي دوم
لا شيء يدوم...لاشيء يدوم
قبل ما النام خليت شجر ونبات
ولما فقت لقيت حيوط وخربات
فين نبات ...فين نبات؟؟؟
ناري مالي وحيد...ويلي مالي براني
فين اصحابي فين اهلي فين اسيادي
دفعني الفضول وتبعت الوادي
فوصلت لبحر كبير عريض وهادئ
قلت وراه يمكن تكون بلادي
فيها نلقى امي وبويا واجدادي
وتم نغني للحياة وبالحب النادي
ونبني بيت ليا ونولد اولادي
انا غادي ...اناغادي...انا غادي
طفيت ناري وردمت رمادي
وتسلحت بالصبر وقلب فلادي
وركبت القارب...
وركبت القارب وما كانش عادي
الناس اللي فيه الخوف فعيونهم بادي
انطلق قارب الموت وراح غادي
وضنيت اني نجحت وتحقق مرادي
وبديت نحلم بافراحي ونتخيل امجادي
حتى اسيقظت على صفارة وصوت ينادي
وداروا بنا ناس لباسهم رمادي
وبداو يسولوا فهدا وسولوا فهادي
ومنين انت جاي وفين انت غادي
حسيت بالخوف وتسالى عنادي
وضاع الصبر وداب القلب الفلادي
تفكرت ماء بيرنا وتراب بلادي
وتدكرت اسمي وتاريخ ميلادي
ناري مانا غريب ويلي مانا براني
غير الزمان اللي اجرفني والداني
انا خوكم...انا انسان
عندي الدليل ...عندي البرهان
نعاود اللي جرى...نقول اللي كان
فالمغرب بلادي من ايام زمان
........ علوي اسماعيلي يزيد......
