نشرة أخبار (باللهجة اللبنانية)
انتلت الدني أرامل
و بحضنهم أيتام
عشاهم شقفة خبز
عيونهم ما بتنام
احلامهم كلها كوابيس
و في ناس بدها بعد
تقاتل بعضها عالفاضي
كرمال كذبة و وعد
قلبي عنهم مش راضي
و بحَكيهم قبل و بعد
...
ليش القتل اللي صار
ال منشوفه عالأخبار
ناس بتشمت ببعضها
فوق حجار الدمار
ليش الكرامة مجروحة
والصورة صارت مفضوحة
كلّ مين تابع لتابع
و مشارك باللي صار
و في ناس ما بتفهم بشي
في ناس بدها بعد
...
الهوا ببلدنا تلوَّث
و فطسنا بريحتنا
ما بقى منّا نوا
نطلع من مصيبتنا
لحقنا عبّاد النار
لحقنا كذب القضيّة
لا شفنا القدس تحرّر
و لا تهنّينا بعيديّة
من وقت كنا صغار
في حروب عالأخبار
و في ناس بدها بعد
...
اليابان خسرت حرب
كبيرة و عالميّة
فيها مضيوا عالذلّ
و رجعت نفسهم أبيّة
و نحنا عشنا بالعكس
لا عرفنا نعيش منيح
وما خسرنا ولا قضيّة
شو حضرت إحتفالات
عن أمّتنا القويّة
حكينا لبعض حكايات
ما بقى تمرق عليّي
معقولة الظلم تكون
نتيجته مُرضيّة
الحبس والإعتقالات
والقتل عالهويّة
و في ناس مش عمتفهم
في ناس بدها بعد
...
في ناس عندها الدين
هوّ حبّ و تسامح
و بتآمن أنّه ألله
البيحاسب أو بيسامح
و في ناس معهم وكاله
نصبوا علينا ميزان
أنا ما بقدر صدّقهم
من اللي صاير لا والله
و في ناس بدها بعد
تطلع على لأخبار
تحرّض عا قتل الأبريا
يموتوا بقلب الحصار
في ناس سلاحها مصيبة
و في ناس عندها قلب
في ناس بتهوى القتل
و في ناس بتهوى الطبّ
في ناس بتبني حضارة
و ناس بتمشي بالقِلب
...
عدنان خليفة 2017
