بتنادوا مين ..؟ صلاح الدين 

حد فيكوا عارف بس هو فين ؟

خلاص صلاح ساب الكفاح 

و فتح له قهوه ف الحسين 

مبقاش يصلي مبقاش يصوم 

وماشي تايه من الهموم 

كل اللي شاغله فيس و نت 

و بت ماشيه من غير هدوم 

و عادي جدا لو... سب الدين

بتنادي مين .... صلاح الدين ؟!

صلاح يا سيدي بيخونوه ..

هو وابوه عشان جعان ..

كل اما ينطق يحبسوه ..

و ياما قطعوله اللسان ..

راهن علي كتب التاريخ ...

و للاسف خسر رهان ..

قالوا عليه ده فيه و فيه

باين عليه جن و شيطان 

ف صلاح بقي .. حلمه يلاقي المشنقه

متعلقه و من غير ميزان 

صلاح خلاص صوت الرصاص

خلاه ضعيف خلاه جبان

عايشها بشروط ... 

مره امن و مره قوت

وهموه هيغرق ف الياقوت ..

بس يغمض ف العينين ..!!

بتنادي مين ... بتنادي مين

سيد صادق