فيه ناس بتقول السعادة علم.
و ناس بتقول السعادة فن.
و ناس بتقول السعادة فكاكة و برمجة.
و ناس بتقول السعادة صهللة و طقطقة.
ياريت ماحدش يسألنى
يعنى ايه طقطقة ،
عشان مش عارف.
لكن عن السعادة
أنا كتير عارف.
السعادة فى الحقيقة معادلة.
بين الرغبة و بين القدرة.
فيه واحد نفسه فى حاجات كتير و ما يقدرش.
و واحد قادر على حاجات كتير لكن ما يرغبش .
عجيبة. ... ليه...هأقولك
أنا واحد من الناس
عاوز ألف الأرض سبع لفات
و فى الااخر أزور القمر...ينفع..
ينفع ..عملها الانسان كتير
بس لو فيه فلوس و فيه صحة.
و فيه عمر فاضل
يسمح بطول مدة الرحلة.
و فيه واحد باللى معاه
يقدر يسعد ناس كتير
لكن مش عايز..طب مش عاوز ليه.
ياريت حضرتك لما تقابله
تبقى توجه السؤال ده ليه.
لكن الرغبة و القدرة
بيحكمهم معامل تالت..معامل الارادة
العقل اللى ربنا اداهولنا بزيادة
و اللى احنا ناسيينه
و مش عارف ما بنفكرش ليه بيه
يا سادة.
و لامؤاخذة فيه الذكى.
و اللى مش ذكى.
زمان و احنا صغيرين قاللولنا العواجيز،
ما تتمناش غير اللى تقدر عليه.
و كون طموح و حاول،
الانسان لو بذل مجهود و صدق النية للخير،
و قال يا رب
فيه كتير تطوله ايديه.
و المعامل الرابع الالتزام
فيه واحد فى سبيل رغبة.
يخسر ربه.
ويخسر صاحبه.
و يخسر نفسه.
و يا خسارة يا خسارة،
ياريت ما تنساش.
ان الدنيا ما تسواش .
وضحت المعادلة.
اتمنى
قد ما تقدر اتمنى
اللى تقدر عليه
و ابذل مجهود.
و اصدق للخير النية.
و قول يارب.
و راعى ربك.
و حافظ على صاحبك.
و اعتبر دايما،،،،
ان أغلى ما فى الحياة كرامتك.
اوعاك تعيش طماع،
تطارد من الأمنيات سراب.
و افتكر دايما دايما
ان العين
ما يملهاش غير التراب .
عجوز غاوى شعر
مرقص اقلاديوس
