انا كنت ماشى مروح
كالعاده جنب الحيط
سمعت راديو بيمدح
يمجد فى رب البيت
زياده فى معاش كح كح
وكمان فى دعم الزيت
وزيادة فى راتب شنكح
واعفاء ضريبة الغيط
فرحت ولازم أفرح
وعليت الزغاريط
الخير جايلك إفتح
كفيك وودى البيت
الغنى بكره هيكشح
الفقر والكحيت
لاقيتنى فجأه بصحصح
فرحان وليه يا عبيط
لابتاخد معاش كحكح
والأزمة مش فى الزيت
وزيادة لراتب شنكح
وانت عاطل أومليت
خريج مركون على اسطح
منتى خلاص عديت
سن العمل إفسح
مكان لكل حويط
وبعد فتره مروح
كالعاده جنب الحيط
سمعت صوت بينوح
ياريتنى مازدت يا ريت
الحاجة غليت أكتر
بنزين وغاز ومليت
وخضار ولحمة وفرخة
وكل ما شتريت
حتى الدوا للصرخة
انا خلاص جنيت
ومراتى طبخت طبخة
بدال الفراخ كتاكيت
والفرحة لبست طرحة
يا ريتنى مازدت يا ريت
صرخت حتة صرخة
واللى عاطل أمليت
لا زاد وشاف الفرحة
ودخله فى الحواديت
مليم يجيب كام فرخة
وجنيه يجيب قراريط
..........وائل سعيد............
