يا فيس يابو شرطة زرقا

جايب زراقك منين

من علم دولة مفارقة

ولا زراق المخنوقين

فيك اللى بيبكى بنار وحرقه

على فراق المكلومين

 فيك اللى غاوى كدب وفرقة

ابدا ما تعرف هو مين

الوانه طيف فى سما و زرقا

يبهر جماله المخدوعين

يظهر فى لون بنات وحرقة

قلوب كتير م العاشقين

وساعات يكون عضلاته شارقه

يحلم بها المحرومين

عدو عامل خلان وفاتحه

احضانها ليك بالسكاكين

روميو وقيس ودفاتره سابقة

واخده ميعاد فى المرحومين

ثوار وثايرة فى صفحة زانقة

آخر غضبهم سطرين يمين

وشيوخ تكفر لرقاب وذابحة

أعراف وهدى المرسلين

صندوق ولامم بلاوى زرقا

ملفوف فى ورد وياسمين

يا فيس يابو شرطة زرقا

أخرة زراقك لمين وفين

......وائل سعيد ..30/6/17....