شميّت عطرها (عن فتاة سوريّه باللهجة اللبنانية)
شميّت عطر الياسمين و سألت عنها
قالوا إجت و راحت عا بلاد مجهولة.
وقالت إذا رجع قولوله يمكن راجعة
عا بلاد حبّي زمان مَربى الطفولة.
لكن اليوم مش قادرة شوف الدمار
و إبكي على بيوت و بساتين و حقولة.
إبكي على اللي راح من روحي نسلخ
و عمري انقسم نصّفين معقولة ؟! .
مش قادرة صدّق كيف الفراق صار
لا هوّ عنّه بينسأل ولا أنا مسؤولة.
...
يا ليت إذا مرقت بغيابي تقولولها
إني بعدني بحبّها وعايش بلا روح.
بلا طر يق بلا زمان بلا أمل
بتبقى بقلبي صورتها مطرح ماروح.
قولولها بعدني على الطرقات طفل صغير
ناطر تا إلعب أنا و جنونها المسموح.
ناطر تا إركض وراها القطها بخصرها
و تضحك إلي ب عيونها وبصوتها المبحوح.
ناطر تا غمض و فتّح عيوني كمان
و تطلع بوجهي خدودها أحلى من التفّاح.
...
ملعون ياللي بيعمل حروب الدمار
و بيدّعي بالقتل بيعمل إنتصار.
ملعون كلّ من بيدوس على الضمير
ويتمنظر علينا بنشرة الأخبار.
ملعون كلّ من بيقتل بريء
و بيشرّد المظلوم وأولاده الصغار.
ملعون كل من بيمشي ورا زعيم
كرمال قرش الدم أو جاه الكبار.
وحدها بتبقى الكرامة مرويّة بالعرق
و بحبّ كلّ الناس بيزيد العمار.
...
عدنان خليفة 2017
