أنا أولى بشكرانك \سامح لطف الله
نسيم الفجر نادانا
لحمد الله وصحَّانا
وزهر الروضة بيسبح
ويشكر فضل مولانا
أنا أولى بشكرانك
تعالي الله سبحانك
***
ودا كروان على الأغصان
يقول الدنيا دي ملكك
وفي الملكوت بعلو الصوت
يسبح من هنا بحمدك
ويشكر فضل مولانا
أنا أولى بشكرانك
تعالي الله سبحانك
***
بلابل دوح بتزقزق
وبتمجد نهار شقشق
وتصحى الفجر ما تعوَّق
تنضف عشّها تروَق
وتشكر فضل مولانا
أنا أولى بشكرانك
تعالي الله سبحانك
***
وتصحى الزهرة من بدري
يصحيها الندي الغجري
وتنشر عطرها يسري
تلاقي الحب قام يجري
ويشكر فضل مولانا
أنا أولى بشكرانك
تعالي الله سبحانك
***
نسيم الفجر إيه زيَّكْ
ونور الصبح من ضيَّكْ
وميّه في جدولك تجري
تخضَّر أرضنا بفَيَّكْ
وتشكر فضل مولانا
أنا أولى بشكرانك
تعالي الله سبحانك
سامح لطف الله
