بين السما والأرض.
بين السما والأرض روحي عمتكافح
و فسطانك الأحمر رجّعني طفل صغير
إلعب مع فراشة طلعت من شرنقة
ال فيها كانت أميرة عاشت دودة حرير
...
و براسي يبرم سؤال عا شو صار الكون
لولا إنتي الأميرة و كون لِك أنا الأمير
وشو سرّ كلّ الّلي صار و بعده عمبيصير
و لشو لمّا كبرت بعده طموحي صغير
...
فراشة طارت من إيدي والشرنقة فاضية
لا عاد في أميرة والقلب مش راضي
بقيت قصّة حرير انغزل بهالماضي
وضيّعت معنى الحياة بفسطانِك الفاضي
...
بين السما والأرض قلبي عمبيموت
و خسرت معنى الكلام رجع يسود السكوت
بين السما والأرض فيكي حلمت و طرت
شو كمّ مرّة عشت و مليون مرّة متت.
...
بين السما والأرض في سرّ مش معروف
في خير و حبّ و رجا و طمع وهروب و خوف
و ناس بتعيش الكذب بتكتب عن الله حروف
وناس بالشتي بعدها بتحلم بكنزة صوف
...
و بعدني بحبِّك ما بعرف ليش ...و بعده سرّ الحبّ غامض و مش معروف
...
عدنان خليفة 2017.
