المشهد الأول
****************
كل الفصول اتقدمت
إلا الأخير
والمسرحيه قربت ع الإنتهاء
الكل قاعد ينتظر رفع الستار
والانكسار
فارد قلوعه ع العمل زى الأمير
رافع شعار الانتحار
والحبل مفتول بالعناء
الصمت فاق كل الحدود
والكلمه لسه ف رجلها بعض القيود
متكعبله تحت الكراسي
والمآسي والشقاء
والكل لسه بينتظر فصل الربيع
اخر فصول الملحمه وحالنا الوضيع
حتي الرضيع
علي كتف امه بينتظر لحظة حنان
لحظة ميلاد لون السحاب
علي جدر شاب صابه الوباء
لساه حزين
علي اب مات من فصل فات
علي جثتين جوه التابوت
علي دمعتين م الذكريات
لساه بيبكي بشنهفه
ع اللي انظلم واللي انحرم
واللي كواه الانفلات
فاتت ساعات
والكل قاعد ينتظر
اخر فصول الملحمه
قاعد بيحلم بالبطل
وف ايده سيف ابيض طويل
بيشق بيه صمت الكلام
اللي انحني
ظلم الافاعي والديابه الغدارين
ويمد ايده للعجوز اللي انسجن
داخل شقوق ظلم السنين
ويطوح السيف اللي ماسكه بقبضته
علي رقبة الخوف اللعين
ويطوف حصانه ف الشوارع
من جديد
يملا الوريد من كاس شجاعة قوته
ويصحي كل اللي انظلم
علشان ما يبدأ من جديد
أول مشاهد فرحته بلون الخضار
فوق الجدار اللي ابتدي يطلع لفوق
لجل ما يقطف م السما ..حبة نجوم
ومعاها شنطه اوسمه
لأبطال عملنا اللي ابتدي يطرح رخاء
كل الفصول اتقدمت
وانا لسه واقف منتظر
آخر مشاهد ملحمه
رافضه بطلها ينهزم
بالخنجر المسموم رياء
******************
رضا ابو الغيط
