أول ضوء لظهور الفجر
بقلمى تامر النقيب
_________________
أول ضوء لظهور الفجر
كل بواقي الليل بتروح
وبطون الناس اللي جعانه
بتبدأ وجبة حزن وقهر
وكمين كان سهران بيرازى
فى كل الخلق
والناس اللى بتمشي فى حالها
حتى جنابها كانت هتطق
وأمين الشرطه المتجبر
ولا بيهمه شتا أو حر
أول ضوء لظهور الفجر
هو الوقت الاجمل دايما
أمسح كل الفكر السارح
وأمحى الطيف اللي يخلينى
أحس بحضن حبيبتى الدابح
وأنسي اللحظه فى يوم ما باعتنى
لسه بشوفها كأني أمبارح
أول ضوء لظهور الفجر
راجعه البنت لبيتها وماشيه
بتحكى لروحها ليالي حياتها
وظروفها اللى في يوم حطيتها
ورميتها ف وسط البركان
كان الأب بيسهر دايما
وأخر اليوم يرجع سكران
ولاحدش حاسس حرمانها
وسابوها لميت ألف شيطان
كل شريط الماضي بيرجع
لما ف لحظه بقت ف الشارع
قلعت توب العفه ولبست
توب الجسد الرخص الضايع
والفقر أما بيفرض جوعه
تتغير له بنود العقد
مابين الشارى و بين البايع
ماشيه وجوة ضلوعها
الدنيا عماله تشغي
طبل ورقص وسكر وخمر
ومن براها محدش سامع
ودموعها على خدودها تسيل
نفسها تلقى بجد التوبه وشئ م الستر
أول ضوء لظهور الفجر
لسه الوقت بيسرق فينا
وإحنا بنقتل فيه ع الاب
ونكلم يجى مليون واحد
خلف الشاشه الكل مذوق
مين صادق طب مين كداب
كنا زمان رغم المسافات بنقرب بعض
دلوقت بنسهر للصبح لكن أغراب
أول ضوء لظهور الفجر
أستعداد أمى بتتوضي تصلى الصبح
وتزيل عنا هموم ملكتنا فى غايه القبح
تدعى وهى بتسجد دايما
إكفي ولادى شر الفقر وشر الجرح
مع أول ضوء لظهور الفجر
إفتح لى المشهد ع الأخر
أفتح أكتر هات الكدر على الإعلام
ركز حبه فى كل المشهد
بس نزيل ظلم الحكام
وأشطب كلمه قالوها السادة
تاخد شعب وتدفع كام
آه ياسواقي النهر الغاضب
لفي وعبى وغني ودورى
الحب عشان يطرح ورد
مش محتاج حرفي ولا بذوري
الحب عشان يطرح ورد
مش مستنى بيان دستوري
آه لو ننسي الخوف والعله
أه يابلد تاهت في السكه
ولا ع الطبله عرفتي تهزي
ولا بالثورة عرفتي تثوري
أول ضوء لظهور الفجر
مشهد خلى القلب بيبكى
قتل وحرق الطفل السوري
أول ضوء لظهور الفجر
وقت بنصبح فيه ونبات
ممكن تتخيل اركانه
وتملي مليان بحاجات
اللى يصلي
واللى يعلى
واللى يقول ف كلام ويحلى
واللى بيحرق شجري وضلي
واللى ناويها يشيل مايخلي
واللى تصيب وياه ما تجلي
وانا ساكت ملتزم الصبر
وباسهر وحدى أعبي كاساتى
حبه مر وقهر وفقر
ومشاهد مش راح أذكرها
ناس بتشوفها في غايه الرقه
وناس بتشوفها في غايه الكفر
وأنا بستنى الأمل الجاي
فى أول ضوء لظهور الفجر
تامر النقيب من مؤلفاتى وليس منقولا
