أستحلفكِ
بالود القديم
والنديم
وأحمدعرابي
وسعـد باشا
والوفد الحبيب
والنحاس والنقراشي
ومجمد عبده
والشيخ والقس
والهلال والصليب
وتسعطاشر
وإتنين وخمسيـن
ونجيب وجمال
والسد وتأميم القنال
والاصلاح الزراعى
والمصانع والعمال
والجلاء والاحرار
والسادات والعبور
والثغرة
والجندي الصبور
واليوم الحلو
وأيام المرار
والسلام والاستقرار
وكل جيل
فداكي جيل
يروح يشيل
يرجع يشيل
ما يوم يمل
أويوم يميل
لجلن يصونكِ
لما لونكِ
يتخطف
أو يتحدف
بين الورود الدبلانين
أو يهينك
أي خائن
أوعميل
ساعتها
أكون لكِ ألفين نديم
أستحلـفـكِ بالأسود الحارسة لحدودك
رجالة واقفة
ف حرك
وف برودك
وبالرجال الحُرة
والقلب الحنون
والليالي المُرة
وبدمع العيون
والبدورالساطعة ف سماكي
من دم الشهيد
والسجل المطوي من نكسة زمان
وبالعدوان
على السويس وبورسعيد
والإسماعلية والصعيد
وبإيمانا
ودينا المجـيد
والسواقي النايحة فيكى من يوم الانكسار
وبالعمار
والنيل وخيره
وحضارة ألآف السنين
والجنين
الجاى من رحم الآنين
للعمر الطويل
والهم التقيل
والقلب العليل
وبكل عيد
معاكي عيد
ينقص يزيد
جوانا ليكي
كام ألف عـيد
حني عاد
هدي الـولاد
وكفاية عاد
أيام بعـاد
أستحلـفـكِ
أستحلـفـكِ
بالأماني إللي جايبها بإيدي
من عضم المحال
والليالي إللي عصرني الشوق عليها
ومنشرني علي المنوال
لجل أغـزل لك
توبك لاخضـر
وأحقق لك
كل الآمال
وأشردني
ف كل بلاد الدنيا الواسعة
وأعودني
علي الترحال
وألففنى
ف كل مينا
لجل أجيب أكل العيال
وأرجع وخيرالكون ف إيدية
بطنية
ومروحة
وكام شوال
وتقابليني بوش ضاحك
وغنوة حلوة
وكام موال
وأحكيلك
ع الزنود السمرة ف كل المطاحن
وإللي طاحن
عضمه في دول الخليج
راجل شديد
والمعاملة سافلة
ذل أكتر م العـبيد
مصر يا أم الدنيا
يا ام التاريخ والحضارة
والفنون والعلوم والأمارة
والرجولة والفهلوة والشطارة
عـملوا ولادك عبيد
وباعوا بناتك بتوب جديد
وتاه منا الوليد
فين دموعك ع الوليد
أستحلـفـكِ
بإللي
وإللي
يللي
يللى الجمال طرز أراضيكي
بخضارالقمح الدهبي
يا وعدي
عليكي يا أرضي
وأنا بأروي
وأقني
وفاسي
ف بطن الأرض تعدي
وتطرح قمحي
وأزرع قطني
ورزي
وأحصد وأغني
وأشبك لإبني
وأجوز بنتي
وأحمد ربي
وإنتي يا غالية
تشكري زندي
تقومي تهمي
معايا تضمي
تلمي ف قمحي
خطوة ف خطوة
بس نعـدي
وتخلي قلبكِ
يوم علي قلبي
مهما تكون الريح مجنونة
إسندي رجلي
وإفتلي حبلي
وإربطي وسطي
وإقفي ف طهري
أستحلـفـكِ
بالنبات الطارح فوق جسرالخجل
والبنات البكرالدايبة مع السنين
طالبين عـدل
إللي فات من عمرها أكتر التلاتين
من قلة العدل
مزروعة ف البيت
زى البصل
ونفسها ف أسرة وولاد
زى أبوها وأمها
وكل العباد
والراجل هو الحياة
هو السند
والـزاد
هو إللي ينفع ف الكِبرْ
هو السؤال
هو الوداد
ضل راجل
ولا ضل حيـط
حتا لو راجل عـبيط
والعريس
تايه تعـيس
بالليل بيحلم بالـونيس
والزيت خلص
من الفوانيس
والهدمة دابت
من زحمة الأتوبيس
وجيوبه فاضية
ولا مليم
وعيونه مكسورة
زى المسجين
مسكين
وحاسس كأنه لعين
إمتا ح تفرح يا حزين
زي كل الفرحنين
ولحد إمتا
ح ندبك ف الانين
وح نوفر الحزن لمين
أستحلفكِ
وأعرفكِ
العمالـة زايدة
وفايضة
وساكتة ف ديوانكِ
والبطالة هايجة
وسارحة
وقاعـدة
ونايمة ف ميدانكِ
والصحاري فاضية
وواسعة
وشاسعة
وناسية لأدانكِ
إدينا أرض بدون روتين
بدون ضرايب
بدون سداد
إن شا اللـه حتا
بدون مرافق
فرصة واحدة
بدون عـيون
تحسد وتقلع
في الجذور
وشوفي مين
هـ يكون أمين
يقدر يصون
أرض الجـدود
ويزرعها حنة
وتبقا جنة
نفتح مشاريع
نزرع مزارع
أو مدارس
أو مصانع للجميع
وإن خيرها عاد
ع الكل عاد
حني عاد
هدي الـولاد
وكفاية عاد
أيام بعـاد
أستحلفكِ
*************
الشاعر رمضان فؤاد أبو الوفا
