الشكوا لغير الـله
مذلة وذِلة
إنك تعـرّي كل إللي ستره الإله
برة
ومُرة
دموع الرجال مُرة
بس الرجولة
الحُرة
أصل الرجولة
عزة
وإياك تعاشر كل من كان ف الديار
عِرة
واللـه ما يساوي راس
فجلة
دا الرِجِل إن دارت عارت وصبحت ف قولنا وقال
وإن هدت عدت ودت وصار ينبعت وراها مرسال
والسؤال
هو السؤال
مين الجدع
ياجدع
لوجدع
جاوب
شايب
وبنت
وولد
مين راح يكون
السند
ومين إللي زاد ف
العـدد
ومين كمالة
عـدد
ومين يعلي ويبني
ومين شغلته
الهدد
إللي وِلِد
وإلا الولد
مدد
يا سيدنا مدد
فرد
طوله بطول النومة فرش وغطا
جيب يا عطا
اللـه عـطا
وما قالش تأخذ كل الغطـا
وأتعري أنا
إوعاك تقول دا شكا
ولا حكا
علة
دى الشكوا لغير الـله
مذلة
ودرة
الكلمة الحرة درة
لو مرة
تخرج ف المناسب
إللي يناسب
دي المكاسب
من غير متاعب
ولا مصايب
ولا عتب
ولو يطول عمرك
راح تشوف العجب
دهب
قلب الرضيع دهب
فارش طريق النسب
ملامح عتب
أصل العتب
من دى المحبة
يا دبـة
قتلتي صاحب العزة
يا كبة
ونكبة
ع إللى يعاشرعديم الفهم كارثة
وآلم
وأنيـن
إوعاكوا تعدوا ف السنين
ضايعة
وتايهة
وفاشلة
هو ده طبع السنين
توهة ووجع
ولوضجع
يستنا دوره
تقف اللقمة ف زوره
ولا يحلا له نوم
وإن كان مفتح تفخت له عين
ولو رجع تاني ف كلامه
راح تعدوا آلامه
ولو ناموا
مين راح يشوف ف منامه
بكرة إللي جي
يملانا ضي
والسؤال هو السـؤال
مين الجدع
ياجدع
لو جدع
جـاوب
هو بكرة صحيح جي
يملانا ضي
ولا جي
يزيد ف الوجع المأصل فينا من زمان
والشابة مالية الطبق حنضل بتأكل ف الولاد
وإللي زاد عطل
وإللي عطل زاد
أصل المراد
تطلع المعدة برة
تفتش عـن الزاد
حلو
ومر
علشان يعدي العمر
وإحنا لسة ف الفانوس
ف زيف النفوس
ف كل الطقـوس
والخروج من عنق الزجاجة
والعفريت محبوس
بيكز ويدوس
علي إسنانه وعلى الضروس
ياهل ترا لوطلع يأخد بتاره
حتا من جاره
لكنه ف حلم الخروج
أخد على الشكوا
المُرة
عشان دا راجل
عرة
والشكوا لغير اللـه مذلة
***********************
الشاعر / رمضان فؤاد أبو الوفا
