رساله من تحت الماء

غصب عنى مشيت يا امى
مشيت وسبتك غصب عنى
غصب عنى وعارف انك
ساكنه جوه عينى وننى
بس لاما الحوجه تاخدك
واللمحك بتضيعى منى
كان ضرورى يا امى
اعمل حاجه علشان اللى منى
عارف ان بعادى يوجع
بس روحت وامتى هرجع
لما ضيق الارض يوسع
والبراح يقدر يشيلنى
عارفه يامه اللى جابرنى عالبعاد
عارفه ايه خلانى ادور بين البلاد
ازرع اللقمه بايدى
يخطفوها اخواتى منى
عارف انك مستحيل ترضى بفراقى
عارف ان الحب دا هوا اللى باقى
بس همشى
ادعيلى ان الله يعنى
روحت يامه وبالدموع بتودعينى
وانت مش مطمنه وبطمنينى
وانت مش طايقه بعادى
ونبض احساسك واصلنى
بس والله فراقك غصب عنى
نفسى طعم الجوع يفارق
يامه حلقك
نفسى لما تمرضى
اعرف اعالجك
نفسى اشوف الفرح ف عيونك يغنى
يامه اسف مركبى مجدافا ضايع
يامه اسف مركبى قبطانا بايع
يامه اسف بحايل الموج
مش حاملنى
يامه سامعك بتناديلى من بعيد
يامه حاسك وانت بتفارقى الوريد
انت مع اخر نفس
كان فراقنا اللى شاغلنى
يامه اسف كنت حالف انى اساعدك
يامه عارف انى بالخير كنت واعدك
بس يامه الموت ماهوش
راضى يجاملنى
محمد الروبى