( سن التقاعد )
يللى نايم ع الفراش
بكره تطلع ع المعاش
بكره تزهق من حياتك
بكره تعرف إن موتك
هو ايضا راح بلاش
الحكومه ودن طين
ودن تانيه من عجين
وانت سارح ف الطناش
والعلاوه ياحلاوه
لسه نايمه ف الجراش
خللى بالك إوعى تصحى
اصل ح تشوفك طشاش
بكره تفهم إن جيبك
جوه خرم ومن قماش
بكره تفهم بس إمتى
لما تعرف إنك إنت
كنت عايش زي شاش
كنت عايش بس بايش
وما تلقى مره نفسك
ماشى تهتف
عاش . عاش . عاش
إبقى قوللى ياحزين
هو فين وللا مين
إللى مات وللا عاش
( نبيل الوردانى )
شاعر