- الشمس خجلانة من ريحة البارود===
مرت هنا
والشمس كات خجلانة من ريحة البارود
والقلب طارح فى ليل الظلم ... دود
وانا بانتظر يطبطب على النهار الودود
يمسح العتمة اللى فرعت فى عيون البنات
الجسم كان منحول
من غيبة الحلم البتول
كاتبين على ورق الشفايف
تواريخ الفراق
مالناش ارداة ان الربيع خناق
واحنا عشقنا الموت
ورسمنا ع المسلات قصايد الاشواق
ياطير حبيس كل الضلوع
كل اللى راح ملهوش رجوع
وقت اللقا ..حضن الدفا
نغم وتاه فى صخر الربوع
فين الطريق
والحصار من صرخة المولود
لحين ما نطفى كل الشموع
مرت هنا
كل الملامح جراحات رتوش
ضوافر زارعه خوف
شكل الورود اشواك
والشجر اللى كان بيحن بضلته
صار نحيل بسحنته
سحب الخريف بسمته
بيمدوا ايديهم جوا تكعيبة عنيكى
يلقطوا العنب اللى ساب الفرع
وبيدوروا عليكى تحضنيه
ليه سايبة قلبى بينعصر
فى الضلمة اللى بالعة الفجر
ما تندهيه
عرقى نزل يرسم على الاسفلت
دربك اسمعيه
مدى ايديكى ولمى حلمى اللى انفرط
الليل فى ضى عينيكى سقط
---------------------------------------------------------
