امى بتحلم زى الناس
لما تنام و تحط الراس
تحلم انها شافت ابويا
واقف هنا مع ناس واقفيين
بس وشوشهم مليانة نور
يوحى بأنهم الصالحين
تحلم انها ماشية طريق
قبلت فى احلامها الضايعة
تحلم انها راحت مكة عملت عمرة
وخلاص راجعة
تحلم انها رايحة السيما
لابسة عباية و فوقها حجاب
تحلم ان ابنها بيعيش
جوة سؤال محتاج لجواب
تحلم انها رايحة السوق
بس السكة عليها بعيدة
تحلم اننا دايما" جايب
ليها ف عيدها هدية جديدة
وانا ما بجبش لأمى هدية
وهى اساسا"
عايشة عشان اخواتى وليا
وف احلامها
لازم تمدح جامد فيا
وتقول جايب ليا هدية
وانا ما بجبش هدايا لأمى
بس دى ساكنة ف ضى عينيا
لازم اخد خطوة بقدمى
لازم اجيبلها احلى هدية
احلام امى مش بتلف لشرق وغرب
احلام امى تشيه لأمى لابسة قشرب
امى عظيمة عليها القيمة
بسكن قلبها لجل ارتاح
لمسة ايدك تشفى جراح
لو غمضت عينيا يا امى
و جيت فتحت
بشوفك احلى ملاك بجناح
بقلمى \ هانى السيد
من وحى اللحظة
