خلاص يا دنيا انسينى
قررت اقفل دواوينى
مش لاقى لحلمى اى مكان
ولا راسى لبر امان
الحلم تاه منى ما بين اوهام
على يد ظالم فى حسنه ماله امان
انسينى يا انا
حرام اكون انسان
عايش بلا معنى ماله مكان
ما بين قلوب ميته
ما تعرف للحب غير معنى
ولا تعرف له كمان عنوان
قررت اقفل دواوينى
واعيش لنفسى ترضينى
بايدى اكتب مواويلى
واغنيها فى اى مكان
تطرب قلوب ضيعه
تعانى من الحرمان
ترددها تغنيها تقولى كمان
انسى يا عينى تشوفي جمال
جمال الروح اسما واعلى
ويعلى فوق الرسم والالوان
ضاعت الروح وباقى
مسخ هذا الزمان
خلاص يا نفسى سمحينى
قررت اقفل دواوينى
كسرت سن القلم فى كراسى
محيت بدمع القلب احساسى
وشاعر بلا احساس
ميت وساير ما بين الناس
وفى يوم مولدى
كفنت دواوينى
مات فيا كمان انسان
كان زاده من الحرمان
بنى بيته من الاوهام
ضاع وراحت فكرته
خلاص يا روحى خدعتينى
ادعى عليكى تفارقينى
مفيش قلوب طاهره تناجينى
وبين ناس فقرها احساس
حبستينى
مين من جهلهم ينجينى
انت بحبهم امرتينى
خلاص يا روحى انسينى
قررت اقفل دواوينى
بقلم حسين محمد