أحمد جلال
إلى شهداء الفرافرة
ـــــ احمد جلال ـــــــ
دول رجال ومجندين
مش فلول ماشين فى ثورة
وللا عُملا ومأجورين
او شباب بيقود مظاهرة
دول جنودنا المؤمنين
مش يهود .. ولا شلة كافرة
ناس غلابة ومطحونين
برة أركان المؤامرة
كان بيجمعهم يمين
مصر تفضل حرة طاهرة
أمة عايشة بدين متين
مستنير وبدون متاجرة
كانوا واقفين فى تاكمين
مرصودين من قاعدة غادرة
بالشهادة موعودين
ع الحدود عند الفرافرة
*******************
اللى كان يحلم يعود
مرة تانية لأكل عيشه
يترمى فى ارض الجدود
تانى بعد ما قضى جيشه
خدمة تانية
فى ارض بلده محتجاله
لاجل يزرعها بخضار ..
ليه ولعياله
الامل يضحك فى وشه
وجوة عينه
يدعى دايما ع المعيشة
الله يعينه
**************
واللى كان واقف بيتوضا
لصلاته
كان فى خدمه من ساعات
والعصر فاته
مية الحنفيه سخنة
نازلة تكوى ايديه وكوعه
يدعى دايما فى الوضوء
وفى سجوده وفى ركوعه
مصر تفضل فى العلالى
ليها يرخص كل غالى
حتى لو كانت حياته
وفى صلاته
الاوامر م القيادة
رغم حر الصحرا .. لابسين البيادة
استعد لى هجمة .. او مناورة
الحياة فى الصحرا
دى اصعب مغامرة
************
واللى راجع لسة حالا
م الاجازة
بالفطار والمانجة ساقعة
فى الازازة
امه عملالهم وليمة
بطتين من الكبار
ست صعيدية وعظيمة
خير ايديها فى كل دار
مصر فيها امهات من دول كتير
نيه صافية وقلب طيب
كله خير
كل واحد من الجنود دول
ابنها
وكل واحد له نصيب
كل مرة الواد يروح عندها
اكل يجهز للمجند والنقيب
********
واللى كان فى الراحة
بيبص فى كتاب
جنبه صورة معلقة
فوق الدولاب
عند لفة سلك شايكة
مصورينه
فجاة جو الصحرا
يتحول ضباب
قبل ساعة من الفطار
هجموا الكلاب
يبقى فى ايدين الملايكة
مغسلينه
*******
الرصاصة وهى طالعة
مش بتسأل
هى رايحة لقلب مين
قلب مسلم او مسيحى
رايحة تقتل
والرصاص مالهش دين
موته حلوة
كل ظباطه وزمايله بيحسدوه
امه واخته بانجازاته
وبعمايله بيذكروه
كان مؤدب .. كان حنين
بكرة فى الجنة ونعيمها
هيشكروه
هى دى احسن مكافأة
من الاله
اللى ما ينسى المجاهد والشهيد
واللى ضحى عشان بلاده
بالحياة
يحيا تانى عند ربه
من جديد
الشهيد فى الدنيا دافع
عن بلاده
ساب حياته .. وامنياته
وساب ولاده
وانتقل من جنة حلوة
لجنة احلى
روحه كانت غالية عنده
بس كانت مصر اغلى
احمد جلال
