عشان أنثى
*********
وهوا علشان ما أنا أنثى
فا .. أي ذنب أنا أشيله
مشاعره تموت و أنا حاسه
ضامم شوقه ف منديله
أموت أو أحيا مش فارقة
مادام سبعي فارد ديله
***
عشان أنثى بأخاف اللوم
هنا ثانية و شقا بالكوم
فقلت كفاية .. ح استرجل
أخد حقي إل كان مهضوم
***
لبست قميص بدل فستان
و بنطال و جزمة ( مان )
و قصيت شعر متعاجب
و بدلته بدقن جنان
***
شربت بريل و سجارة
بارزت شبابنا ف الحارة
زاحمت كمان على الأتوبيس
ثبت مكانتي بجدارة
***
و .. ع القهوة حكاوي كتير
عن فتكات كمان و سهير
نِعد خطاوي ع السبحة
مابين ضحكة و شهق زفير
***
و بصبصت لبنات و حريم
بغنيوة فريد و حليم
بَدرت وعودي شرق و غرب
كأني ( جان ) في فيلم قديم
***
و نزوات في الخلا تتمد
مبادئ فوق قيم تتهد
صحيت من حلمي مرعوبة
لا انا طايلة .. سما و لا أرض
***
و قررت أكون أنثى
بألف قرار بلا مهاودة
لا أقبل ظلم أو تهميش
لأرض الحِس أنا معاودة

سعاد الزامك