أخرة الغرور
محمد ضباشه
غندورة ومتغندرة
زادها الجمال حبة
بالكحلة متصورة
تفرس متين شابة
نهودها متهورة
وريحة الثمار هبة
فى مشية متمخطرة
ماتسمع لها دبة
عليها حبة غرور
خلوا بحرها سقعان
وعينيها تروح وتدور
وتبهر الجدعان
وهى كطاقة نور
لكن الدفا بهتان
حتى الصباح مايدور
لأى كائن كان
خطبوها يجى عشرين
والفرحة ماتمش
ماحد ملو العين
أيه يعنى ما يهمش
تاهت منها السنين
وأهو وشها كرمش
لا ندمت على الغايبين
ولا عيب ومايصحش
خدها الغرور وياه
لقبر فيه مدفون
مع اللى كانوا معاه
وشربوه شراب ملعون
وعاشوا فيها حياة
صورة وبالكربون
م اللى ما عقله نداه
وخلاها عليه بتهون
وقت الجمال لو آن
فى ساعة نخضع له
دا لكل فاكهة آوان
أهو قول ونسمع له
فى كل قلب مكان
نفرح ونعشق به
ولو زمانا عاد
بالعقل نحسب له
