اطيب قلب
علم كل الدنيا الحب
قلب نبينا
عايش فينا
من غيره الدنيا ماتتحب
اطيب قلب
طفل يتيم والمولى رعاه
ربنا من اعدائه كفاه
كافل كل يتيم وياه
ف الجنه يكون جمب بجمب
.
اطيب قلب
بيحب الضعفا المساكين
مليان قلبه بحكمه ودين
كان لو حس بقلبه حزين
يدعى المولى يقوله يارب
اطيب قلب
نهر تسامح بحر وفاء
يوم ما تمكن م الأعداء
قال إذهبوا انتم طلقاء
الإسلام بسلام مش حرب
اطيب قلب
مبعوث رحمه للعالمين
مرفوع ذكره ليوم الدين
شهدوا الكفره إنه امين
وإنه ما جرب يوم الكدب
اطيب قلب
بالوالدين وصي وبالجار
بنسائنا وقالها بتكرار
دينا معامله ماهوش إجبار
رحمه على العالم تتصب
اطيب قلب
صوره ربه ف احسن صورة
اهداه نفس ما هيش مغرورة
رأيه مابين اصحابه مشوره
كان الأخ وكان الأب
اطيب قلب
قال بلغوا عنى ولو آيه
تبقالكم ولغيركو هدايه
إسلامكم مش بس كفايه
لازم يوصل شرق وغرب
اطيب قلب
معصوم من نفس وشيطان
اخلاقه دى كانت قرآن
تشهد ملائكة الرحمن
إنه ما اذنب يوم ولا ذنب
اطيب قلب
بقلمى/محمود عبد العظيم
