تحت دعاوى الحب
الخِسة فى الحب مرض
أعراضها كلام معسول
وتلاقى الصح شرد
عن الحياء على طول
والجنس يصبح غرض
ولكل حتة يطول
والشوق فى القلب برد
وشمسه ضيها مقتول
تحت دعاوى الحب
اللحم بيبقى رخيص
وأول طريق الذنب
على ناصيته إبليس
رياح غوايته تهب
تخليك من المناجيس
والرجل ساعتها تدب
مع اللى أصلة خسيس
الحب قيمة جميلة
جوه القلوب تتصان
لا يعرف طريق الرذيلة
ولا بقلة أدب يتهان
ولا بتسبيلة عيونه
وضمة فى ليل سعران
هتروح فى سكة ذليلة
وما تعرف العنوان
عنوان الحب آية
جوه القلوب مكتوب
ولو رويته بعناية
لازم تكون محبوب
ويبقى طريقك معايا
فيه الوحش مشطوب
ويعشق ترابك هوايا
ويبقى الحلال مطلوب
وانت يا سايقة الدلال
هو الحلال معيوب
وليه طريق الوصال
فيه الشرف مغلوب
ونسمع قيل وقال
عن حب كله عيوب
صدق صحيح اللى قال
الرب رب قلوب
