‎أسوار العناد لسعاد الزامك‎ with ‎فوزي اسماعيل‎ and 49 others

نامت الحروف
*********
نامت الحروف
صِحيت تشوف
نفس الظروف
و حياة مطفية
***
الدمعة لسه تطوف
بعيون ملاها خوف
تغيير حروف بحروف
حدوتة وردية
***
شَعر إتغزل بالشيب
يا بت يكفا .. عيب
بلاش تقولي نصيب
ده هم يا صبية
***
ليه ألِم فـ حروفي
و أضحك بدل خوفي
و أنسى مرار جوفي
و أداري حنية
***
كان الشباب غلاب
و إلا الحياة دي عذاب
نفس السؤال و جواب
إياكي يا صبية
***
نفسي في بوح مفتوح
أصلِح و أسامح روح
همي مسيرو يروح
و أرجع مِلالية
***
يا هم انساني
طبعك كده أناني
غدرك .. بيهواني
حَولني ضبابية
***
إحباط ورا إحباط
و الجفن ملوه عياط
ماهو لئيم و إحتاط
و الغدر حوالية
***
عمري ما كنت أرتاب
و أقول نصيب غلاب
قَدر اتكتب بحساب
لحياتنا .... الجاية
***
أنا ياما صوتي إتبح
و ظنوني طلعت صح
دا كلامه كله دبح
عن حُبه لحورية
***
كان يحكي أهو و خلاص
نسي حبي و الإخلاص
و حنين فاق الإحساس
استكفى بيها هيه
***
الصرخة مخنوقة
و الدمعة مشنوقة
و بسمة مخلوقة
على شفة مطوية
***
كان طعنة لشبابي
و رفضت خطابي
و حروفي في كتابي
طمستها أنانية
***
كان الحنين بستان
زارع فدان حنان
الشوق كان ياما كان
ماهو بخت يا صبية
***
سارحة الدموع عـ الخد
بتهد فيا .. هد
تتعد من غير عد
ليه بكيتي ياعنيا
***
فكرت أعمل إيه
إزاى أحاجي عليه
بأشوف أمل فـ عينيه
و حنينه للتانية
***
لا حـ ألومه و لا أعاتبه
و لا .. حـ أندم على حبه
راح أطبطب على قلبه
ماهو كان فـ يوم ليا
***
و منين أجيب له كلام
مافاضلش إلا حطام
ما اتعد مـ الأنام
و ملامحي مخفية
***
يارب صبرني
و لا عمري تخذلني
زيح عشقه ده عني
لجل أبقى مرضية

سعاد الزامك