نفسى أسافر
للشاعر : أحمد الشبراوى محمد
..........................
نفسى أسافر يوم
أسافر وأجيلك
وأكحل عيونى بصورتك
وفى نن عينى أشيلك
وأدعى من قلبى
أدعيلك
ربى يا ست الكل
يحرسك
ومن كل عين يا عيونى
يصونك
..................
نفسى
أسافر وهاجر
اعدى بحور
أو أجيلك طاير
بس أجيلك
اكون معاك صبح ومسا
من ذهب الشمس
أعملك عقد ك
ومن ضوء القمر
أنسجلك ضفاير
بس أسافر
.....
نفسى أسافر واجيلك
حضنك ليا حنان ودفا
حضنى ليك غطا وستاير
وقفتك جنبى
ظهرى مرايتى
جناحى وانا طاير
طايرفى السما
أو على الأرض ساير
نفسى أجيلك
نحكى معا و نتسامر
انسجلك من نور عينى
أحلى تاج، فستان، بدواير
وأبنيلك جوا قلبى
قصور وعماير
وتكونى أميرتى
وأكون طوع الأوامر
بس أجيلك
أسافر وهاجر
......
