هلت ليالي العيد .... بقلم / عماد محمود

هلّت ليالي العيد .... والكل مستنِّــــــي.
يخرج بلبس جديد .... فرحان ومتهنِّــي.
تقابل علاء وسعيد .... سلّم عليه وهنِّي.
وعيّد على الواد عيد....هيفرح وهيغنّي.
وهلّت ليالي العيد
هلت ليالي العيد .... صلّينــا أهو وجينــا.
نفطر بكحك العيد .... قبليهــــا زكّينـــــا.
لجل أما يبقى العيد .... بركة كده علينـــا.
نبارك كده في العيد .... لاصحابنا واهالينا.
وهلّت ليالي العيد
هلت ليالي العيد .... افـــرح كـــده وعيّــــد.
مش شرط تبقى شديد .. عليهم يا سي السيد.
فرحة عيالك عيد .... فبــلاش كــده تنكّــــد.
بأقل حاجة أكيــــد .... هترقــــص وهتـعيّد.
وهلّت ليالي العيد
هلت ليالي العيد .... نتصافى نتصالح.
الخير كتير بيزيد .... بس اما نتسامح.
هعِيد كمان وهزيد .... عشان تكون فالح.
عملك هيبقى أكيد .... باقي ومش رايح.
تحياتي ..... عماد محمود 1 شوال 1436هـ .
17 يوليو 2015م.