المكالمه
رن التلفيون رديت عليه قلت اهلا ياسعادة البيه
والصوت ده مش غريب عليا ده صوت اخويا نزيه
قال ازيك يانبيه قلت وحشني شوف من قد ايه
ضحك وقال عاوز تشوفني ليه عشان الكام جنيه
رديت انا مخنوق الدنيا غلا الاسعار مولعه بالسوق
انت عارف اني محقوق وانت عمرك ماتخر الحقوق
دلقوتي مزنوق ومش لاقي حق الشاي والنشوق
قال بكره تروق والميه تضرب بالعالي وتطلع فوق
قلت انا محتاج مصروف بصراحه كنت منك مكسوف
تعالي هنا و شوف من الزعل وشي بقي مخطوف
قلي مالك كده ملهوف قلت انت عارف كل الظروف
قلت معاك فلوس بالالوف ومفيش رحمه و لاخوف
اتكلم بصوت عالي قال انا استاهل كل اللي جرلي
ضيعت عليك كل مالي وانت طمعان ليه في حلالي
رديت كفايه ياغالي انك كلت نصيبي وظلمت عيالي
ضيعت كل امالي وفضلت ابكي زماني علي حالي
زهقت وقفلت التلفيون وبقيت ساعتها زي المجنون
قلت منين راح اسدد الديون تعبت من الفقر الملعون
ازي اخوايا وتخون والدنيا ليه غداره مفهاش حد حنون
مهما ان بكيت العيون الحزن راح يفضل بالقلب مدفون
الشاعر مدحت فضل
