.......................... أرجـوكـي إتكلـمي ................
........................................................................
أرجوكي إتكلمي ليه سكوتك
ومش كل السكوت رضا
أرجوكي إتكلمي إيه شروطك
ومش كل الشروط قضا
أكتبي وانشري خطوطك
والعيون تقــــــرا الــــودع
إتكلمي وسمعينا صوتك
إتكلمي وعلينا السمع
قولي اللي في تابوتك
إفتحي بابك لكل الوجع
إتكلمي بكل اللغات
وكفاية بقي حياة البجع
فضفضي بلاش سكات
الأنين جـوانــا أتفجــــع
إفردي دراعك يلمنا
إتكلمي بكل ثبــــــات
إفرشي شراعك يضمنا
لمينا من كل مكان
وجواكي نعيش كلنا
ضللي علينا بالأغصان
والخير متلتل في أرضنا
وأرفعي هامتك للعنان
ح يطاطي ليكي الجبل
ويشع فيكي كل الأمان
ويرعرع في غيطك الأمل
وكل أرضك تبقي بستان
إتكلمي وكلمة الحق أمانه
فضفضي وإطلقيها دانه
كلمه مكتوبه في كل ديانه
في الأرض مزروعه
وجوانا مسمـــوعه
عمر الصدق ما يبقي خيانه
................................................................
............ إحساس ... حسـن الشـوان..... موثقة...