مرقن بنات همي
يتجولن ماشات .
علي بساط الريح
حملن معاناتي
سرحوبا بالبلدات
💢💢💢💢💢
شافوني كل الناس
لابساه توب المي
متلفحاهو لباس
مغسول بموية النيل
سبعا من المرات
💢💢💢💢💢
لا غيرت لونو
الغاني زي الليل
ضوقني حسراتو
جرعني كاس الويل
من حملو هد الحيل
وخرج اليقين زفرات
💢💢💢💢💢
كفرت بي ريدك
نقشت حروف قلبي
وتليتو في قصيدك
ونست بيها الليل
وغنيتا في حجوات
💢💢💢💢💢
هاجت ضفاف نيلي
كسرت قيود الصمت
سالت حروفي بحور
لغيري كم الهمت
ولابد من البوح
سرا ولو كلمات
💢💢💢💢💢
لاحت بشارات سعد
من الله كان الوعد
يجزي صبرنا دعاء
نلقاهو في الدنيا
يرفع بها البلوات
💢💢💢💢💢
موجك بيهدر زيف
مهما طمح نيلك
وكسر معاهو القيف
حامل كتير مغني
نضما لذيذ وشفيف
ماظني تاني اعود
عيناتي ليك تجود
امطارحنين وصلات
💢💢💢💢💢
سفني في بحرك
غرقن مناراتن
رافعات بوارق الحن
الا الجفا جاطن
هزاها بقوة
غيرن مساراتن
غصبا عن التيار
رجعن سريع ماخرات
💢💢💢💢💢
الشفنا في ريدك
شيب روؤس ولدان
لا زول بيصدق قول
ولو حتي شافو عيان
توهت لشعورنا
بضلك طريق الحن
ودرت لعقولنا
بي جفوه كانت جن
ايه الحصل خلاك
حمضت صورة ابليس
وفي اللقطه كنت ملاك
وبدلتا ريدنا الفات
💢💢💢💢💢
مجبور اقول ليك
كل الكتمتو زمان
عانيت صباباتي
هجرك وجور حرمان
عايشاها اهاتي
راكبه الجحيم نيسان
يطوي شوارعي عبور
والقلب في خفقان
يعلو ويهبط بي
اخر محطاتك
مكتوبه في لافتات
💢💢💢💢💢
ونزلت بي صعوبه
عسمني شيل الهم
ختيتو باعجوبه
فتحت بكجي بشيش
طلعت لي ربطه
فيها الحظوظ نقطه
مسحت بيها العين
وشفت الجفا وهمات
💢💢💢💢💢
ما ظني اقدر احيد
عن ريدك امشي بعيد
دقاني مسمارك
جنب زاويه في جدارك
افضل معاك دوام
صامولتي شوق وهيام
بتلف علي يمناك
تربطنا في احكام
ملصوقه بي يسراك
سوا حياة وممات
💢💢💢💢💢💢
رجعن بنات الهم
من رحلتن في الليل
شايلات معاهن ذم
لكل من باع ريد
فكك اواصر الدم
وكل الهوي المنساب
بي راحتو ولا عذاب
مكتوب جبينو كتاب
مافينا منه مفر
لا هربه لا افلات
💢💢💢💢💢
غسلت توب سفري
عطرتو ختيتو
في ضلفه في دولاب
ومفتاحا فنيتو
في رف بعيد مهجور
في الذاكره واريتو
ختيت عصا الترحال
اسيب دياري محال
ياك سيد ريدي
البيك كان عيدي
ايديك في ايدي
نمشيهو مشوارنا
والالفه في جوارنا
حبك مع حبي
ستفنا في رحالنا
ويقيني بيك ثبات
💢💢💢💢💢
في رحلة العمر
غنيلنا ياقمري
خلي الصدا يرتد
واحزانا تبدا العد
من عشره لي واحد
سالاك ياواحد
لمن نجي الواحد
روحينا في واحد
ويتوحدو القلبين
نطرد غراب البين
ونعيش حياة جنة
خاليه من خيبات
💢وجدان الزاكي💢
ساحة النقاش