(1)

يابت ضواية،،

ياعصفورة أنيقة وغناية..

يوم لاقيتك،،

رحل الحزن الكان جوايا..

برؤياكي أندهشت غيمة -

أنشدهت وردة،،

ورسم الكون جمالك آية..

همس الشوق البان في الرعشة،،

ونظمك دررو أحلي حكاية....

(2)

حكاية النخلة السمحة وأصيلة،،

وجوة أعماقا بتحضن نيلا..

كل الوادي ردد نغمة،، 

ومن نغماتو أهداها هديلا..

وشاح النور في جبينا الضوا،،

ومن خديها نسج منديلا..

مسح الجرح الفيهو أحزاني،،

طيب روحي البيها عليلة..

(3)

ليها أتشابي القزح النائي،،

وفي الألوان لونا إضافي..

كلمة جميلة حاضنة حروفا،،

في أشعارنا أحلي قوافي..

في أحلامنا ديمة معانا ،،

وفي نغماتنا همس خرافي..

(4)

يوم لاقيتا الضاحكة عيونا،،

وطلت في دنيانا الحلوة وصافية..

عمت كل الكون فرحة جديدة ،،

ورجعت للاطفال البسمة الخافية..

أبتسم الزول الكان بيعاني،،

وعادت ليهو أيام العافية..

(5)

ياحورية الجنة الفوق،،

ياإبداع الرب الصانع..

يالمخلوقة وداعة وذوق،،

ياإشراق النور الساطع..

يامنسوجة سحابة وزهرة،،

يامقطوفة الغصن اليانع،،

يامتمازجة نضارة وبهرة،،

ياأسطورة الجيل الرابع..

****

بت ضواية....أحمد كمال...

*****