خليني حاساهو الامان
واحساسي ليك ماتجهلو
انا من عرفت الريده بيك
ايامي جد اتجملو
لحظات سعادتي معاك بس
ومر الفراق مابحملو
لو في الخيال طيفك يلوح
تلقاني عايشه اليوم حلو
انا منك انت واكتفيت
ود عيني انت مكيلو
ما اظني من بعدك اريد
لو حبك انت تحولو
بعدك بسد باب القلب
ترباس عديل انا بقفلو
لو فرشو ليا الكون حرير
جابو النجوم واتنزلو
غيرك انت ولا بكون
دنياي ظلاما بزملو
وياك سيد فرحي وهناي
كل العذابات انجلو
يرقص شعوري مع غناك
وحروفي بيك اتكملو
اعزف لي الحانك وداد
وليك عمري بزيلو
ببصم علي دفتر هواك
اشواقي بند في اولو
الالفه وخفقات الحنين
بين السطور اتجولو
ماعندي زول في الدنيا دي
غيرك ولا بتخيلو
اصلي من تبيت صغيره
خاطري ريدك ميلو
خلاني في روض الخيال
ازرع حنانك واشتلو
اسقيهو من كاس الزلال
كوثر حنيني الهيلو
يا ريدي يا منية سقيم
في عافيه تغشي تقيلو
انا جد بكون ممنونه لي
كل الظروف تجمعني بيك
يازولي لو
💥وجدان الزاكي💥
ساحة النقاش