_مجرد صدفة __
صدفة عجيبة ما بتنفات
والنيل قدامك والضفات
وقفت نخلة . .
انسانة رقيقة فى شكل ملاك
واتشجعتا . . .
واتوكلتا . . .
مديت ايدى وسالمتا. .
اتماديت وعزمتها شاى
وعشرة ونسة على شارع النيل
الشاى سادة وبخور حتة . . .
جرينا كراسينا الاتنين . . .
جنب ست الشاى بت نورين . . .
والشاى قرفة . . .
وكبابى مجيهة بالمسكة . . .
جلسنا نعاين فى الماشين . . .
ناس ماشة شمال . .
ناس ماشة يمين . .
واحدين جاريين . .
واحدين هايمين . .
واحدين جالسين . .
واحدين زى حالتنا الاتنين . .
قطع الصمت براد الشاى. . .
وكشكش براد الشاى . . .
واتوسط بيناتنا الاتنين . .
والدنيا مغيرب وبين لونين . . .
مديت ايدى على السكر . .
كم معلقة قولى يا سكر . . .
قالت شاى نص وبدون سكر . . .
فى سرى سألت الروح . . .
لى شنو السكر . . .
ما دام الروح فيك معسولة . . .
وزهور الحسن فيك مشتولة . . .
مديت ايدى واديتا الشاى . . .
وهى بتشرب فى كوب الشاى . . .
شربت منى اساى وشقاى . .
شاقت روحى . . .
وزدات لهناى . . .
واهدتنى عيون مااااااااااا بتتوصف
ورتنى خدود نورهن بختف . . .
وحواجب مقرونة بتهتف . . .
للرمش الطال . .
وكتين يطرف . . .
وبريق البسمة البتكيف . .
لمن يسرح فاطرك يحلف . . .
لى سواد الليل الفى شعرك . . .
واريج الورد فواح عطرك . . .
جانى كلامك زى الموج . . .
مرات يعلو . . .
ومرات يخفت . .
وانا بين ضفاتك سارية وشوق . . .
واحلام بتسافر وما بتتعب . .
سرحت معاك فى جنس حكوات . . .!
وكلام معسول زى الغنوات . . .
غنوات بتشيلك غيمة وروض . .
غنوات بتضوى الليل شمعات . . .
مرت ساعات واجمل لحظات . . . .
ما بين الونسة والضحكات ...
ما بين الفرحة الطلت وجات . . .
زادت فى الشوق . . . أنبل ساحات
ساحات بتلمنا من تانى. .
ساحات بتهدينى امانى . . .
واشجان تحكيها اغانى . . .
اتفارقنا وبينا ميعاد . . .
موعد افراح بهجة اعياد . . .
وغيمه ظليله فى القاسيات . . .
واحة وريفة فى الصعبات . . .
لمن يغشانى رهق الليلات . . .
حتمد للفال باقات احساس . .
وتسوق الروح لأجمل واحات . . .
اشرف الفوال
شارع النيل/10/2014 الســـــ 9 ــاعة م /
ساحة النقاش