ما تغضبي..!! .... أنا قلت ليك ماتغضبي برعم هواك لسع صبي إتحملي..و إتفاءلي وصبر المحبين جربي وما تغضبي.. .... قالوا الغضب ريحا تهب تطفئ بريق عقل المحب كدي أهدي إنتي وفكري إتمهلي وشوفي السبب إتمعنيهو وفسري مابتخسري.. وحتكسبي ماتغضبي.. ما تغضبي.. ... نحنا السمح دايرنو ليك والله ما شامتين عليك ديمة الحقيقة نقولها ليك وراي البريدك أقبلي... وما تزعلي.. أرجوكي ما تتعصبي.. وما تغضبي.. ما تغضبي.. ... ويا حلوة صدرك إفتحي شيلي العشم إتوشحي توب الصبر إتلفحي وخليك بشوشة وسامحي وكل المخاصمك صالحي مدي الأيادي وصافحي ... إنشري في كل الوجود غيمات فرح تمطر تجود أسقي الأرض..أبقي الورود أبقي الأزاهر فتحي أبقي الشذي..داوي الأذي وما بين مسامات البذور إتسربي.. وما تغضبي.. ماتغضبي.. برعم هواك لسع صبي إتحملي..وإتأملي.. وإتفاءلي.. صبر المحبين جربي وما تغضبي..!! ما تغضبي..!! أحمد بخيت خليفة( ودالحمر) الجمعة 23/9/2005 أم درمان