الجن البوم 

.............

كلمات : محمد إسماعيل الرفاعي 

 

 أُمبارِح شالني حُمار النوم ودّاني  لأغربْ حوليّه 

الجِن كان برقُص

  في المردوم

 لابسلو سديري وعراقي

 سروال ومشنِّق  طاقيه

 مُتحزّم شر والنص مقسوم ) علْعولو ) جدادةً 

 بطريه

  وكبيرن شاقي الواطه بِحوم

 بس ركبو تطقطِق زي نَيّّه 

يتضاحك يوزّع في البسمات شبعان ومستّف فتّه ام توم يلهط في المشيه 

 وفي الجيّه 

وانا كنتا بحِس وحدي المحروم

 رقّعتا الجيب البات مخروم     

 متعشّم جاياني 

هديّه 

هديّة إيه والجو  ملغوم والناس تتساءل

  ما هيّه ؟

 والحلوه اللابسه  قميص النوم 

تريانه مندّيه مرويه كانت بتغنّي غُنا

 ( الحَرُوم )

  اللول اللول يا لوليه

  يا سيدنا الفيك تب

 محريه 

أظهر في شكل غرابنا الشوم

 في الليل الحالِك ضُهريه 

بس اوعا تجيبو معاك البُوم العامل حولك

 دوريه

 اتحلل واقبل بي المقسوم ما قلنا خلاس مافي

 قضيّه 

 واللول اللول يالوليه اللول اللول يا لوليه

 وانا كنتا براي مادّي الطرُّوم قاعِد في آخر كونِيّه

 بس كان حواليني كنار وبلوم نتفاكر بي كُلِ رويّه

 نتطلع بس كاسينا وجوم

 لي الشمس التطلع فجريه !! 

 

 9 / 9 / 2014م