لا متين
خيالك يزازي
في احلامي
يسكن فيني ويقلق منام عيني
يحرمني النوال يمنعني
من قرب الوصول وانا كان نويت الارتحال
ربطت في بقجا كبار احساسي
مديت خطواتي
من سرعتي نسيت النعال
امسك خيالك شان اقيف شان
اواصل باقي عمري واطلعك
من جوه شعري
بلا صياح وبلا انفعال
يازول تعال
ياانت كملت الصبر
في لحظة الشوق البواح
ماعرفت من وين التقيك
ماانت ضيقت المجال
وانت المصر وانت الملح
بي اني ارجاك في الهجير تحت المطر
واشد ليك سرج المحال
يازول تعال
امسك زمام اشواقي ليك
هدهد حنيني
وابقى لي هنا ومآل
وارح تعال نسوي بينا النيل
حكم ونشهد القمري البقوقي مع العصاري
وننزل علي جرف الحنين
الكان بيسهر من فراقنا ودمعو سال
انا قلت ليك انك ملفلف في دواخلي حنان
عمر اصوات فرح كوم انتشى لي
باركنو سنين طوال
يازول تعال
انا وانت نمرق من فجر نختر علي وسع الفجاج
نتكن التيراب عشم تملا قلبك باليقين
زي تربه تحلم بالوصال
يازول تعال
انا بمشي اختف ليك نجم
وانت كابس في الهلال
ماانت محروس بالحسن وانت مكمل بالجمال
وانا برضي حارسك بي هواي
بحجاك من ناس قيل وقال
امرق تعال
اسرع تعال
ماالليل نجيماتو ابتدت تغزل طريحات الغياب
نعس القمر ناوي الزوال
الحق سحابات الحنين
وافتح مجاريك للوصال
انا في رجاك يازول تعال
وانا عندي ليك وديان حنان
ومسور حروف ونسيم جروف قبل الزوال
اسرع تعال
من قبل ما يموت الحلم قبل ماتجف الدموع
قبل ما امل السؤال
وتصبح الامال سراب
وتخور قواي وتجف منابع ريدي ليك يازول
ارح اسرع تعال
شاعر احمد حسن المقلي
ساحة النقاش