رباعيات
وعزة نفسي اغلى عندي من نظرات عيونك
تاني كرامتي مابتسمح اكون مرتع ظنونك
وكم قضيت سنين عشت سعيد بدونك
ومحال تلقيهو زي يداري عليك يصونك
%%%%%%%%%%%
هيلو المكرمات والشكره من آباهو
وجودوبيهزم الطائي الضبح لي شياهو
متل ود القبائل نلقى وين اشباهو 
يدو تريه عقبال لينا طيب فاهو
%%%%%%%%%%%%%%%%%%%%%
يالغايبين حقيقه وفي الخيال ساكنين
غاراكم نفوسكم وفينا ماسائلين
المارض القلوب وعمش العينين
راجين الوصال متين تجونا متين
%%%%%%%%%%%
لا بتسأل لا بتجامل ياب نفيسا عطرو فاح
تنكر اشواقنا وتكابر برضنا نقول ليك صاح
لا بهمك يوم حزنا لا بتواسينا الجراح
ورغم هجرك ورغم صدك نحن طالبين السماح
%%%%%%%%%%%%%%%%%%%%%
ياخالق الخلوق رب الكتار والقله
تجمع شملي بي زولا  مجافي الخله
الخلاني شارد نومي جابلي العله
رموشو سهام وزمامو التقول الجله
%%%%%%%%%%%%
طالت غربتك ليلك ظلام وجروح
ضاميك الوجع وين ماتجي وماتروح
القلل منامك خلاك تئن وتنوح
زولا ذوقو عالي وعطرو ديمه يفوح
%%%%%%%%%%%%
كم داريت هواك كم ساهرت ليل
ضاعت امنياتك حار بيك الدليل
ضراك الطمع مارضيت بالقليل
اصبر وشدو حيلك كان صبرك ينيل
%%%%%%%%%%%%%
يفوق نداك لي ندى العنبر وطيبو
سعادة الزول التريدي ويبقى لي قلبك حبيبو
ياورد يادوبو فتح لسا يانع لسا دوبو
نحن عايزين الوصال الا ماعارفين دروبو
شاعر احمد حسن المقلي