قصيدةللأديبة /سوسن حامد سليمان
بعنوان ( بتضحك ليه يا مبارك )
بتضحك ليه ؟!
بتضحك ليه يا مبارك
قاعد فرحان ونِـسيت عارك
بتضحك ليه يا مبارك
هو إنت نسيت إللى عملته
ولا نسيت كام شاب قتلته
ولا نسيت إللى قلته
يا أنا يا الفوضى
يا أنا يا أنتو
بتضحك ليه يا مبارك
هوه إحنا نسينا إللى عملته
ولا إحنا نسينا مين إنتوا
ولا إحنا سامحنا إزاى خنتوا
لأ لأ لأ يا مبارك
أصلا ما هننسى ولا نبارك
وهـ نفضل ضدك نتعارك
وايدينا ضدك بتشارك
بتضحك على إيه يا مبارك
يا قاتل شباب البلد
يا موصى البلطجيه بخراب البلد
يا قاتل أطفال قبل ماتتولد
بتضحك ليه مبارك
بتضحك .. بتضحك لعصابتك
واقفه مشاوره لك
خََليت حق الشعب ضاع
و هتعمل ثورة جياع
بتضحك ليه يا مبارك
بتضحك على مصر المخروبه
ولا على مصر المنهوبه
ولا ع الفتنه المنكوبه
ولا المحاكم المحروقه
ولا المناجم المسلوبه
بتضحك على إيه يامبارك
بتضحك على نفسك ولا علينا
إحنا خلاص بَـطلنا بعدك
ينضحك علينا
محدش غيرك خدعنا
وباعنا وضحك علينا
بتضحك على إيه يا مبارك
الضحكة دى موش عاديه
دى ضحكة سخريه وهستيريا
م اللحمه وشرب الملوخيه
وحلاوة روح شم التقليه !
يا كهل وموش ها أقولك شيخ
يا قاتل أطفال وشيوخ
من أكلك الكفيار والبطروخ
طالع الضحك منك
طـاخ طـاخ طـوخ
معلش ماقلنا لك دى حلاوة روح
ونشوف مين إللى هيضحك فى الأخر
وكل شى له آخر
وإنت أخرتك قربت
طمعان ... طمعان فى إيه تانى
يا صابغ وناتف وخالع سنانى
يا عايش تمانين سنه
كفايه كده يا أناني
منك آه ياني ياني
دى جماعتك آسفين يا ريس
موش هترجعك رئيس تانى
دَفعت لهم كام وبعت لهم ايه تاني
همه دول احفادك
في الفساد والخراب والحرق بدل ولادك
عشان تضحك في السجن وتشبع ملذاتـك
أوعـاك .. أوعاك يا مبارك
تُنصر نفسك علي آلام البلد
إللي خربتها وأخدت لنفسك
منها الجلد والسقط
بتضحك ليه يا مبارك
مصر ... مصر من بعدك
هـ تقوم أحسن قومه
وهـ تنهض من مرضها وهي مظلومه
من حُكمك لها تلاثين سنه
مهلهله في ايديك وملكومه
أوعاك ... أوعاك تفكر إنك الأحسن
أحسن منك كتير
من ولادها المخلصين
هـ يحفظوا عليها آمنه طول السنين
إضحك ...إضحك ... وإضحك يا مبارك
علي نفسك وموش علينا اضحك يا مبارك .
الأديبه / سوسن حامد سليمان
